राहुल पिंपळे व भरत काळे यांच्या खुनाचा तपास एसआयटी/सीआयडी मार्फत करण्याची मागणी
राहुल पिंपळे व भरत काळे यांच्या खुनाचा तपास एसआयटी/सीआयडी मार्फत करण्यात यावा
उपोषणकर्त्या आदिवासी पारधी समाज भगिनी वैशाली पिंपळे यांचे अनुसूचित जाती जमाती आयोगास निवेदन
मुंबई, दि. 27/ विशेष प्रतिनिधी
आझाद मैदानावर न्यायासाठी मागील २८ दिवसांपासून उपोषणाला बसलेल्या आदिवासी पारधी समाज भगिनी वैशाली पिंपळे (रा. गणेश नगर, ता. राहता, जि. अहिल्यानगर) यांनी राज्य अनुसूचित जाती-जमाती आयोगाचे उपाध्यक्ष धर्मपाल मेश्राम यांना वरळी येथील अनुसूचित जाती- जमाती आयोगाचे कार्यालयात निवेदन दिले. या निवेदनात श्रीमती पिंपळे यांनी राहुल पिंपळे व भरत काळे यांच्या खुनाचा तपास एसआयटी किंवा सीआयडी मार्फत करण्याची मागणी केली आहे.
यावेळी आयोगाचे उपाध्यक्ष मेश्राम म्हणाले, हे निवेदन अहिल्यानगरचे जिल्हाधिकारी, पोलीस अधीक्षक, एकात्मिक आदिवासी प्रकल्प अधिकारी, सहाय्यक आयुक्त, समाज कल्याण यांनी तत्काळ प्रभावाने कारवाई करावी व त्या माहितीचा तपशीलवार अहवाल पाठविण्यासंबंधी पत्र लिहून निर्देशित केले.
याबाबत आयोगाच्या कार्यालयात दि ७ एप्रिल ला तक्रारकर्ते महिला पुरुष व उपरोल्लेखित अधिकाऱ्यांच्या बैठकीचे आयोजनही करण्यात येईल व या गरीब आदिवासी परिवारासह न्याय मिळवून देण्यासाठी अनुसूचित जाती जमाती आयोग पुढाकार घेईल असेही त्यांनी सांगितले.
याप्रसंगी आयोगाचे सदस्य सचिव संजय कमलाकर, वरिष्ठ संशोधन अधिकारी मीनाक्षी आडे, पोलिस निरीक्षक सोनम पाटील, विधी सहायक ॲड. राहुल झांबरे उपस्थित होते.
*****
