भारतातील तरुणीला दुबईत फाशीची शिक्षा
प्रेमप्रकरण भोवले : पंतप्रधान मोदींकडे मागितली मदत
E T News
उत्तरप्रदेशातील बांदा येथील एका तरुणीसोबत असं काही घडलं, की आता तिला थेट पंतप्रधान मोदींची मदत घ्यावी लागली आहे. बांदा इथे राहणारी शहजादी सध्या दुबईतील अबू धाबी येथील जेलमध्ये बंद आहे. यावर्षी ऑक्टोबर महिन्यात एका लहान मुलाच्या हत्येच्या गुन्ह्यात तिला फाशीची शिक्षा दिली जाणार आहे. हे प्रकरण समोर आल्यानंतर समाजसेवी संघटना आणि राजकीय पक्षांनी बांद्यातील निर्दोष मुलीला वाचवण्यासाठी पंतप्रधान आणि राष्ट्रपतींकडे विनंती केली आहे. पीडित शहजादीने स्वत: वडिलांना फोन करुन पंतप्रधान मोदींकडे मदत मागितली आहे.
बांद्यातील गोयरा मुगली गावात राहणारी ३३ वर्षीय शहजादी या तरुणीचा आग्र्यात राहणाऱ्या उजैर नावाच्या तरुणाशी फेसबुकवरुन ओळख झाली होती. यादरम्यान दोघं एकमेकांच्या प्रेमात पडले. शहजादी आजारी असायची, त्यामुळे उजैरने तिला उपाचारासाठी आग्र्यात बोलावून घेतलं. तसंच तिला दुबईत विदेशात उपचारासाठी घेऊन जाण्याचं आणि समाजसेवी संस्थेत काम देण्याचं आश्वासन दिलं. त्यानंतर तिला दुबईत राहणाऱ्या आग्र्यातील एका दाम्पत्याला विक्री केलं.
दुबईत तिला एका दाम्पत्याकडे विक्री केल्यानंतर ती तिथे घरकाम करत होती. काम करण्यासाठी या दाम्पत्याने तिचा मानसिक आणि शारीरिक छळ केला. यादरम्यान या दाम्पत्याच्या एका बाळाचा मृत्यू झाला. बाळाचा मृत्यू चुकीच्या उपचारांमुळे झाला होता, पण त्या दाम्पत्याने शहजादीवर मुलाची हत्या केल्याचा आरोप करत तिला या प्रकरणात अडकवलं. या आरोपांनंतर शहजादीला फाशीची शिक्षा सुनावण्यात आली.
प्रेमी आणि दुबईतील दाम्पत्यावर खटला दाखल
दोन दिवसांपूर्वी शहजादीच्या वडिलांनी दुबईत राहणाऱ्या दाम्पत्य आणि आग्र्यातील तरुणाविरोधात तक्रार दाखल केली. माटौंध पोलीस ठाण्यात मानवी तस्करीसारख्या गंभीर कलमान्वये तिघांविरोधात हा गुन्हा दाखल करण्यात आला होता. ही बाब समोर आल्यानंतर रोटी बँकेने जिल्हाधिकाऱ्यांमार्फत पंतप्रधान आणि राष्ट्रपतींना उद्देशून निवेदन पाठवलं आहे. शहजादीवरील ही कारवाई अत्यंत निषेधार्ह असल्याचं म्हणत या संपूर्ण घटनेची निष्पक्ष न्यायालयीन चौकशी व्हावी, दोषींना शिक्षा व्हावी आणि शहजादीला दुबईतून सोडवून भारतात परत आणण्यात यावं. तसंच जनता दल युनायटेडच्या प्रदेश महिला नेत्या शालिनी पटेल यांनी पीडितेच्या कुटुंबीयांची भेट घेऊन प्रकरणाची माहिती घेतली. यानंतर त्यांनी बिहारचे मुख्यमंत्री नितीश कुमार यांच्याशी फोनवर बोलून त्यांच्याकडे दुबईतून शहजादीच्या सुटकेसाठी प्रयत्न करण्याची मागणी केली.
हजादीने गुरुवारी आपल्या वडिलांशी फोनवर बोलून, वडिलांच्या माध्यमातून समाजसेवी आणि राजकीय पक्षांकडे मदत मागितली आहे. मला मरायचं नाही, मी जेलमधून बाहेर आल्यानंतर माझ्यासोबत झालेल्या अन्यायाबाबत सर्वांसमोर येऊन सांगेन, असंही ती म्हणाली.
